БисмиллáхIир рахьмáнир рахьúм
ХIан, къинхетаман бутт тIебеа вайна. ХIан, жоьжахатаха хьалхавуьту бутт тIекхечи вайна. ХIан, вайга кхойкхуш кхайкхамча ву: «Диканиг лоьхуш верг, схьавола… вониг лоьхуш верг, саца» - бохуш. ХIан, жоьжахатенан неIарш дIачIаьгIна ю, ялсаманенан неIарш дIайиллина ю, хIан, шайтIанаш дIадихкина ду.
ХIан, хIара къинхетамаш охьабиссош бу, хIан, хIара къиношна гечдарш массо маьIIехь дIасадаьржаш ду.
ТIаккха мичахь бу-те, муьтIахь хиларш дан кечбелларш? Мичахь бу-те, АллахIах кхоьруш, Цуьнга тобанца бирзинарш, АллахIан къинхетам боьхуш берш? Мичахь бу-те, жоьжахатенах шаьш хьалхабитар лоьхуш берш? Мичахь бу-те, лакхара дика ойланаш ерш? Мичахь бу-те, ялсамане езаш берш? ХIан, хIара ю-кх шуна и ялсамане, юххе ялйна дIахIоттийна!
Мичахь бу-те, къинош динарш? Мичахь бу-те, галбевлла лелларш? Шайна Iасаллашца бохамаш бинарш? ХIан, хIара жоьжахате ю шуна, шен неIарш дIачIаьгIна лаьтташ!
Схьавола, сан хьомен ваша… сихло вайшиъ цхьаний, тахана муьтIахь хиларш дукха дан? Халкъаш кхоьллинчу делаца барт бе вайшима, вонаш а, Iасаллаш а кхин цадан?
Варийлахь, тIаккха а, варийлахь, сан хьомен ваша, сан хьомен йиша, йолаха а, мелаха а хIокху баттахь бевллачех хиларха ларлолахь! Ма докъазалла ю хьуна, хIара аьтто хьан цахилахь! Ма хьуна ца луург хилла хьуна, АллахIа хьуна геч ца динехь!
Къахьега, вуха ма вала, къарлой кIел ма виса, хьайн гIодаюкъ къовле тIеозае, АллахIана муьтIахь хиларийн бошмашкахь хьайн ма хуьллу кхарста хьажа! Буьйсанна гIаттий а, хьо волчехь марха даститий а, мискачуьнан а, йисина Iечуьнан а гIодай а, бона коьртах куьг хьакхий а, Сийлахь Къуръан деший а! Даггара а, цIенна Шен дуьхьа а Iамал-Iибадат дина къахьегчеран ял а, къинхьегам а АллахI дойур долуш вац хьуна.
Цундела, хIай къадинарг… цул тIаьхьа цхьá бехказло яц хьуна хьан.
Массо а некъаш АллахIа кеч ма дина хьуна хьо Шена тIеваийта, къиношха вухавáлийта, юха а хьо Шена тIеверзийта цIенчу дагца, тоба дина, доIанаш деш, дохко ваьлла.
Айхьа хьо эца. Мах хьоьгахь болуш бу, базар а дIайохаза ю!
Хьекъалениг ша-шен хьесап дийриг ву, веллачул тIаьхьа долчунна (эхартана) Iамал йийриг ву.
Декъазниг, гIорасизниг, ша хIумма а ца деш, АллахIан дикане сатуьйсуш верг ву.
ТIаккха цуьнга цIеххьашха саоьцу малик догIу, тIаккха чIогIа мохьбетта волало иза: «Амма царех цхьаьнга валар деъча, цо олу: Сан дела, вуха дуьненчу ваккхахь со». Дохко волу меттиг ма яц и!
АллахIе доьху вай жоьжахатех дерриге а хьалхадитар, дикачаьрца а, АллахIана муьтIахь хиллачаьрца а вай ялсамана дахийтар!
Шайх / Набил Аль-Iивадий
Гочдинарг: ИбрахIим
